Heddwch a natur: adeiladu rhwydwaith UNESCO yng Nghymru

Mae'r Biosffer yn trefnu gweithdy ym Mhrifysgol Aberystwyth fel rhan o raglen o ddigwyddiadau i ddatblygu potensial dynodiadau UNESCO yng Nghymru. Read in English

Mae pŵer dynodiad y Biosffer yn gorwedd yn ei achrediad gan UNESCO ac aelodaeth o rwydwaith rhyngwladol â delfrydau uchel, sy'n cefnogi ymchwil a dysgu.

Ddwy flynedd yn ôl, Comisiwn Cenedlaethol y DU ar gyfer UNESCO a helpodd y Biosffer i gymryd cam ymlaen gyda'i raglen Lleol i Fyd-eang. Ynghyd â grant gan Lywodraeth Cymru, roedd hyn yn golygu y gallem ddiweddaru ein gwefan a'n gwaith cyfryngau cymdeithasol, datblygu strategaeth codi arian a chyrraedd cynulleidfaoedd newydd gyda digwyddiadau.

Nawr mae'r rhaglen yn ôl, gyda chyllid pellach gan Gronfa Dreftadaeth y Loteri Genedlaethol, ac yn y gwanwyn hwn mae'r Biosffer yn helpu i drefnu cyfres o ddigwyddiadau a fydd yn bywiogi rhwydwaith UNESCO Cymru yn ei gyfanrwydd.

Rydym yn cychwyn gyda gweithdy ar 4 Mawrth ym Mhrifysgol Aberystwyth. Mae hwn yn gydweithrediad â'r Adran Gwleidyddiaeth Ryngwladol, sydd â chysylltiadau hanesyddol â sefydlu UNESCO, a bydd yn cynnwys siaradwyr o'r byd academaidd a phartneriaeth y Biosffer, yn ogystal ag Academi Heddwch a Dinas Llên newydd Aberystwyth/Ceredigion.

Thema'r gweithdy yw adeiladu heddwch yng nghyd-destun ein perthynas â natur. Beth mae'n ei olygu i fodoli ochr yn ochr â rhywogaethau eraill, i deimlo ein bod yn rhan o natur, ac i ofalu amdani? Sut mae hynny'n cefnogi cenhadaeth UNESCO i greu "heddwch yng nghalonnau dynion a menywod"? Gallwch archebu eich lle am ddim yma a lawrlwytho'r rhaglen isod.

Building Peace with Nature_workshop programme_cy.pdf

Download PDF • 414KB

Ar 16 Ebrill, bydd Geoparc Byd-eang UNESCO Fforest Fawr yn cynnal digwyddiad yn Ystradgynlais a fydd yn canolbwyntio ar dreftadaeth naturiol a diwylliannol rhan o'r Geoparc presennol, ynghyd ag ardal gyfagos y gallai ehangu iddi. Bydd yn ystyried sut y gellid dathlu gwahanol elfennau o'r dreftadaeth leol honno a gwneud cyfraniadau cadarnhaol at yr economi a'r lles lleol.

Bydd y gweithdy yn cael ei gynnal ar y cyd â dau sefydliad arall; i) Sefydliad Celf Josef Herman, elusen sydd wedi'i lleoli yn Ystradgynlais ac sy'n gweithio ledled Cymru i gefnogi'r celfyddydau, addysg, hawliau dynol ac i hyrwyddo bywyd a gwaith Josef Herman a ii) Twristiaeth Bannau Brycheiniog, y gymdeithas fasnach dwristiaeth.

Bydd digwyddiad GeoMôn ar 13 Mai ar Ynys Môn yn archwilio sut y gellir defnyddio asedau'r Geoparc orau i gyfrannu at iechyd a lles cymunedau lleol. Bydd pwyslais arbennig ar weithgareddau i bobl â phroblemau personol a chymdeithasol cydnabyddedig, a bydd y cyfranogwyr yn cynnwys ymarferwyr iechyd, grwpiau cymunedol, sefydliadau ieuenctid, a busnesau lleol.

Cynhelir y gweithdy mewn cydweithrediad â Mind over Mountains, elusen sy'n cynnig cefnogaeth ffitrwydd meddwl proffesiynol trwy gyfuno teithiau cerdded dan arweiniad arbenigwyr mewn lleoliadau naturiol gyda hyfforddwyr a chwnselwyr lles profiadol.

Gobeithiwn y bydd y tri gweithdy yn elwa o gyfraniadau o safleoedd UNESCO eraill yng Nghymru, sy'n cynnwys pedwar Safle Treftadaeth y Byd a chadeiriau Prifysgol yn Abertawe a Chaerdydd.

Yn olaf ar 18 Mehefin bydd digwyddiad ar-lein i rannu'r dysgu o'r rhaglen a gweld beth yw'r potensial ar gyfer cydweithio yn y dyfodol yng Nghymru. Mae adeiladu heddwch yr un mor bwysig ag erioed, felly gobeithio y bydd rhai ohonoch yn ymuno â ni y gwanwyn hwn.