Pobl ifanc Dyffryn Dyfi yn dathlu pobl, diwylliant a mentergarwch eu cynefin

Mae Menter a Busnes wedi eu comisiynu i weithio gyda phobl ifanc i arddangos Biosffer Dyfi a'i gyfleoedd entrepreneuraidd trwy ymgyrch ffilm a chyfryngau cymdeithasol.

​

Mae dalgylch yr afon Ddyfi wedi ei ddynodi yn ardal Biosffer gan UNESCO ers dros 10 mlynedd. Yn un o saith ardal biosffer UNESCO yn y Deyrnas Unedig, a'r unig un yng Nghymru, mae'n cynnig cyfleoedd dirifedi i bobl, cymunedau a busnesau'r rhanbarth.

​

Bydd prosiect Ti bia'r Biosffer yn adnabod y cyfleoedd hynny, a manteisio arnynt ar ffurf cyfres o ffilmiau byr sy'n dangos mentergarwch ar ei orau.

​

Pobl ifanc yr ardal fydd yn cynhyrchu'r ffilmiau, felly mae Menter a Busnes yn chwilio am bobl ifanc brwdfrydig a chreadigol rhwng 16 a 30 oed, sy'n awyddus i ddatblygu sgiliau cyflwyno a chreu ffilmiau i ymuno â'r criw cynhyrchu. Bydd y ffilmiau yn cael eu cyhoeddi ar y cyfryngau cymdeithasol.

​

"Mae'n brosiect cyffrous ac yn gyfle i'r criw ddysgu sut i ddylunio ymgyrchoedd cyfryngau cymdeithasol effeithiol, a'i harfogi i'w defnyddio i godi proffil eu llwyfannau digidol eu hunain" dywedodd Einir Davies, Menter a Busnes.

​

Trwy fod yn rhan o'r prosiect, bydd pobl ifanc yr ardal yn derbyn hyfforddiant cyfryngau, cynhyrchu ffilm a chyfrathrebu ac yn dysgu sut gellir gwneud y mwyaf o Biosffer Dyfi er lles eu cymunedau a'r economi leol.

​

Pa fath o beth fydd y criw cynhyrchu yn gwneud?

1. Darganfod beth yw'r posibiliadau ar gyfer cychwyn busnes yn ardal Biosffer Dyfi

2. Derbyn hyfforddiant cyfyngau er mwyn datblygu sgiliau cyflwyno a chyfweld

3. Dysgu sut i gynhyrchu ffilmiau byr

4. Adnabod a chyfweld entrepreneuriaid lleol i'w cynnwys yn y ffilmiau

5. Helpu i ddylunio a gweithredu ymgyrch cyfryngau cymdeithasol i arddangos y cyfleoedd sydd i gychwyn busnes yn yr ardal